Një person është lënduar pas rënies së kulmit të ndërtesës së Komunës së re të Prishtinës.
Lajmin për mediat në Prishtinë e ka konfirmuar zëdhënësi i Policisë së Kosovës, për rajonin e Prishtinës, Agron Borovci.
“Rreth orës 13:00, është raportuar se në rrugën “Nora e Hotit” në Prishtinë, një person ka marrë lëndime si pasojë e goditjes nga materiale që janë shkëputur nga çatia e një objekti”, tha ai.
“Policia menjëherë ka dalë në vendin e ngjarjes dhe mbështetur në informacionet e para është raportuar për një person të lënduar, femër, e cila është dërguar në QKUK për trajtimin e nevojshëm mjekësor”, shtoi Borovci.
Ndërsa, ka potencuar se policia ka nisur hetimet për të zbardhur rrethanat.
“Aktualisht policia ka nisur punën për zbardhjen e plotë të të gjitha rrethanave që karakterizojnë ngjarjen”.
Ekipet e emergjencës së Prishtinës janë në vendin e ngjarjes, teksa rruga është e bllokuar nga Policia për qarkullim të automjeteve.
Aktualisht situata shëndetësore e vajzës 23 vjeçare që është lënduar pas rënies së kulmit të ndërtesës së Komunës së re të Prishtinës, është stabile, por që lëndimet trupore që ka marrë janë të rënda.