Lokacioni yt

Cyrih, 10 Dhjetor 2024 – Në një ceremoni emocionuese që u mbajt në ambientet e Konsullatës së Republikës së Kosovës, u përurua një ashensor i ri për njerëzit me nevoja të veçanta. Kjo ngjarje përkon me Ditën Ndërkombëtare të të Drejtave të Njeriut, duke simbolizuar angazhimin e Konsullatës për të siguruar qasje të barabartë për të gjithë qytetarët.

Konsulli i Republikës së Kosovës, z. Vigan Berisha, në shenjë përkrahjeje ishte ulur në një karrocë të invalidëve në mes të Valdete Hoti-t dhe Islam Aliaj-t që fillimisht i përshëndeti të pranishmit dhe shprehu kënaqësinë e tij për këtë moment historik. Ai theksoi se ky është një nga fjalimet më emocionuese në karrierën e tij duke e konsideruar këtë projekt si një të drejtë njerëzore dhe ligjore që sot bëhet realitet. “Synimi ynë është të krijojmë kushte të barabarta dhe dinjitoze për çdo qytetar, pa asnjë përjashtim,” tha ai.

Ky ashensor për njerëzit me nevoja të veçanta është një hap i rëndësishëm drejt përmbushjes së angazhimeve për mbrojtjen e të drejtave të njeriut dhe ofrimin e mundësive të barabarta.
Z. Berisha falënderoi z. Ekrem Hasani, CEO i Spitex Melina’s Medical Care, për mbështetje të jashtëzakonshme në realizimin e këtij projekti.

Në këtë ngjarje ishin të pranishëm gjithashtu deputeti i Parlamentit të Konfederatës Zvicerane, z. Islam Alija, dhe aktivistja e njohur për të drejtat e njeriut, znj. Valdete Hoti. Të dy ata e përshëndetën këtë iniciativë si një hap të rëndësishëm për qasjen e barabartë të personave me nevoja të veçanta.

Znj. Hoti e filloi fjalimin e saj me emocione, duke theksuar se është e drejtë njerëzore që njerëzit me nevoja të veçanta të kenë qasje në të gjitha hapësirat dhe të mos ndihen të lënë anash. Ajo falënderoi z. Hasani për mbështetje dhe theksoi rëndësinë e këtij projekti për barazinë shoqërore.

Deputeti Alija gjithashtu shprehu mirënjohje për këtë iniciativë, duke e vlerësuar si jetike për personat me hendikepe.
Z. Hasani, i cili qëndronte prapa këtij projekti, ndau përvojën e tij dhe angazhimin për ta bërë këtë projekt realitet në Ditën Ndërkombëtare të të Drejtave të Njeriut.

Z. Rexhep Rifati, i pranishëm në ngjarje, e nisi fjalimin e tij me falënderime për familjen Hasani dhe përmendi shembuj inspirues, duke përfshirë historinë e një djali të ri që, pavarësisht sfidave, arriti të jetë i suksesshëm.

Me këtë rast shumë të veçantë për një fjalim rasti u lut edhe znj. Analiess Schneler që të thoshte disa fjalë të rastit e ku ajo me pak fjalë përshëndeti këtë hap shumë të rëndësishëm dhe me disa fjalë edhe shqip i përshëndeti të gjithë të pranishmit.

Në përfundim, z. Berisha ftoi Xhemën (Xhemajl Selimi), një veteran i luftës së fundit, për të ndarë përvojat e tij i cili me këtë rast falënderoi personalisht zonjën Analiess Schneler që ndihmuan në rehabilitimin e tij dhe 6 veteranëvë tjerë të plagosur gjatë luftës dhe i thurri elozhe asaj.
Z. Florim Useini gjithashtu falënderoi z. Hasani për kontributin e tij dhe theksoi rëndësinë e këtij projekti për komunitetin duke thënë se: është z. Berisha ai që ka hapur një derë ndërsa është z. Hasani ai që e ka zbukuruar këtë derë.

Ceremonia përfundoi me ndarjen e një Mirënjohjeje për z. Ekrem Hasani, duke u ofruar të pranishmëve mundësinë për të fotografuar me mysafirët e ftuar dhe për të shënuar këtë moment të veçantë në historinë e Konsullatës së Kosovës. Ky projekt është një hap përpara në krijimin e mundësive të barabarta dhe një shenjë e angazhimit për të bërë të drejtat e njeriut realitet çdo ditë.