Lokacioni yt

Sot patëm nderin dhe kënaqësinë të kishim mysafire në studio Zëvendës Kryeministren dhe Ministren e Punëve të Jashtme të Kosovës, Znj. Donika Gervalla – Schwarz së bashku me stafin e saj si dhe korin diplomatik të Konsullatës së Republikës së Kosovës në Cyrih në krye me Konsullin Berisha.

Në një moment të rëndësishëm për politikën dhe sigurinë në Kosovë, Albradio pati kënaqësinë të mirëpriste Zëvendës Kryeministren dhe Ministren e Punëve të Jashtme, Znj. Donika Gervalla – Schwarz. Ky ishte një rast i shkëlqyer për të marrë informacione nga dora e parë mbi situatën aktuale në vend, duke e bërë këtë bisedë një mundësi të vyer për dëgjuesit tanë.

Përmes këtij bashkëbisedimi, u fol për temat më të rëndësishme që po ndikojnë në Kosovën e sotme. Një nga pikat kryesore ishte situata në Veriun e Kosovës, u bisedua për gjendjen e sigurisë pas sulmeve terroriste të grupeve kriminale të aranzhuara nga regjimi despotik i fqinjit tonë verior ku tensionet janë rritur kohët e fundit i cili synoi të dëmtonte infrastrukturën e sistemit energjetik duke dëmtuar kanalin Ibër – Lepenc. Kjo ngjarje ka ngjallur shqetësime serioze për sigurinë dhe stabilitetin e rajonit, dhe u fol se si qeveria e Kosovës po e trajton këtë situatë delikate.

Një tjetër temë e rëndësishme që u diskutua ishin edhe përgatitjet për zgjedhjet e ardhshme që do të mbahen më 9 shkurt 2025. Ne pyetem Znj. Gervalla – Schwarz për prioritetet e qeverisë në këtë proces dhe se si po punojnë për të siguruar një proces zgjedhor të lirë dhe të ndershëm.

Përveç këtyre temave, u bisedua edhe për prioritetet kryesore të politikës së jashtme të Kosovës, duke përfshirë marrëdhëniet me vende të tjera dhe angazhimet ndërkombëtare për të kuptuar se si Kosova po pozicionohet në skenën globale dhe cilat janë objektivat e saj strategjike.

Gjithashtu do të mund të ndiqni audio-inçizimin e bisedës me Zëvendës Kryeministren në webfaqen e Albradios në linkun:https://www.albradio.ch/audio/ te rubrika “Intervista”.