Lokacioni yt

I ftuar në Koncertin Jubilar të mbretëreshës së këngës që i takon gjithë Botës Shqiptare, Shkurte Fejza, “50-vjet Zëri i Kombit”.
Profili i kësaj këngëtareje, modeli më i mirë në rrugën e muzikës, është cilësuar si një nga zërat e artë të Kosovës, një nga këngëtaret më të dashura nga të gjithë shqiptarët kudo që ndodhen.
Ajo shquhet jo vetëm për veçantinë e vokalit, por edhe për faktin që gjithë karrierën e saj muzikore e ka bazuar mbi tabanin kombëtar, duke përformuar gjithmonë me motive patriotike, një zgjedhje, një vendim, të cilit i ka qëndruar vazhdimisht besnike si formë dhe si tematikë.
Ajo i takon asaj gjenerate rinore që për popullin e Kosovës ishte pararoja e luftës patriotike, ishte promotor që në situatat më të vështira qëndroi në ballë, duke kontribuar për lirinë me gjak, me inteligjiencë dhe me këngë.
Shkurte Fejza është pjesë e këtyre ngjarjeve historike dhe inspiruese e ndjenjave kombëtare, legjenda e frymës së patriotizmit dardan, që ndezi dhe ushqeu shpirtin e të gjithë shqiptarëve, duke kuruar edhe plagët më të thella me të cilat u ndëshkua populli i pa faj i Kosovës.
Për Shkurte Fejzën vlerësimet janë pa fund. Kur flitet për muzikën tradicionale shqiptare, shumëkush e fillon me të. Disa e quajnë “këngëtare emblemë”, ndonjë kolege e saj “këngëtare lapidare”, si dhe shumë epitete të cilat ajo i meriton, sepse i fitoi me punën dhe magjinë e zërit të saj, i këndoi atdheut ashtu siç di vetëm ajo. Kënga e saj u bë “himn” e “kushtrim” për breza.
Ajo është një nga këngëtaret më të mëdhaja të Kosovës me 50 vite karrierë artistike. Vërtetë është një artiste me plot kuptimin e fjalës, frymëzuese porsi stina e pranverës.
Ndër kulmet e interpretimit të repertorit të saj është kënga: “N’xhamadanin vija-vija”, këngë që zor se mund të ketë shqiptar që nga Saranda deri në Mitrovicë që mos të dijë ta këndojë. Kjo këngë lindi kur shpirti i një populli të ndarë padrejtësisht nuk duronte më. Kjo këngë e interpretuar me kaq zjarr nga këngëtarja Shkurte Fejza, ishte ndoshta thirrja e parë historike dhe lajmëtarja e realizimit të bashkimit kombëtar, që sot nuk është larg. Për këtë këngë, meritë të padiskutueshme kanë edhe dy artistët shkodranë, poeti prof. Alfred Çapaliku dhe kompozitori prof. Zef Çoba “Mjeshtër i Madh”.
Albumet e Shkurte Fejzës përbëjnë një shifër rekord, një nga këngëtaret e rralla që ka kaq shumë këngë, me një repertor kaq të pasur. Janë 35 albume. Është vërtetë një punë e madhe, një sakrificë gjithashtu e madhe, e cila është shpërblyer, pasi është krijuar një respekt dhe një vlerësim shumë i madh për emrin dhe meritat e kësaj këngëtare të madhe.
Për këto merita ajo është vlerësuar me Titullin e Lartë “Mjeshtre e Madhe” akorduar nga Presidenti i Republikës së Shqipërisë z.Bujar Nishani në vitin 2013.
Krahas figurave të shquara të muzikës, ajo ka bashkëpunuar edhe me autorët e teksteve që me fuqinë e fjalës i kanë dhënë fuqi e vlera këngës.
Mund të përmendim mjeshtrat e fjalës në Kosovë e Shqipëri si: Faruk Tasholli, Ymer Shkreli, Fatmir Muja, Bekim Lumi, Arsim Bonjaku, Bekim Mislimi, Avni Qaili, Sami Aliu, si dhe poetët nga Shqipëria: Gjok Beci, Jorgo Papingji, Hamit Alia, Alfred Çapaliku, etj, duke pas kënaqësinë e madhe që edhe unë jam i përfshirë me këto emra të shquar.
Këtë kënaqësi sigurisht që do ta shijoj në këtë koncert madhështor, pasi në repertorin e këtij koncerti bën pjesë edhe krijimtaria ime.
Në vijim të këtij publikimi dua të theksoj edhe një moment të një interviste që kësaj ikone të këngës shqiptare, i bëra para 10 vitesh, në recitalin e saj, ku me shumë emocion ajo tha: “NESE UNË KAM QENË ZËRI JUAJ PËR 40 VITE, JU KENI QENË JENI DHE DO TË MBETENI FUQIA E SHPIRTIT TIM PËR TË NGRITUR KËNGËN SHQIPE NË NIVELIN QË E MERITON”.
Le t’i urojmë suksese kësaj ikone të këngës shqiptare që zëri i saj nuk njeh kufi, por shpirti krijues dhe virtuoziteti i interpretimit të këngëve, janë një pikë referimi për shumë këngëtarë profesionistë që debutojnë në skena të ndryshme edhe nëpër botë, duke transmetuar një identitet të veçantë kulturor.
Nga Ramazan Çeka